Законот за органско земјоделско производство беше усвоен во Собрание, означувајќи важен чекор кон развојот на земјоделството и усогласувањето на државата со европските стандарди.
Овој закон создава модерна и појасна рамка за развој на органското производство, зајакнувајќи го системот на контрола и транспарентноста на пазарот.
Според чл.11 од ЗОЗП
(1) Субјектот кој произведува органски производи мора да ги почитува барањата за органско земјоделско производство кои се утврдени со овој закон и со прописите донесени врз основа од овој закон.
(2) Барањата за органско земјоделско производство се применуваат на целокупното земјоделско производство во согласност со одредбите од овој закон и прописите донесени врз основа од овој закон.
(3) Само производите и супстанците одобрени во согласност со постапките од членовите 24 и 25 од овој закон можат да се користат во органско земјоделско производство, под услов нивната употреба во неорганско производство, исто така да е одобрена во согласност со посебните прописи донесени врз основа од овој закон.
(4) Производите и супстанциите кои се дозволени за употреба во органско земјоделско производство, под услов да се одобрени со прописите за фитофармацевтски производи се следниве:
а) антидоти/протектанти, синергисти и коформуланти како составни делови на фитофармацевтски производи и
б) помошни средства (адјуванти) кои што се мешаат со фитофармацевтски производи.
(5) Употребата на производи и супстанци во органското земјоделско производство за други цели, кои не се опфатени во овој закон, се дозволени под услов нивната употреба да е во согласност со начелата утврдени во членовите 5,6,7 и 8 од овој закон и прописите донесени врз основа од овој закон.
(6) Во преработката на органска храна или храна за животни како и во преработката на суровини кои се користат во органската храна или храната за животни не смее да се користи јонизирачко зрачење.
(7) Забрането е клонирање на животни и одгледување животни кај кои дошло до појава на вештачки предизвикана полиплоидија.
(8) Превентивните мерки и мерките за претпазливост треба да се применуваат во секоја фаза од производството, подготовката и дистрибуцијата каде што е неопходно.
(9) По исклучок од ставот (2) на овој член, земјоделското стопанство може да се подели на јасно и ефективно одделени производствени единици за органско земјоделско производство, за производство во преод и за неорганско производство, под услов во производствените единици кои не се за органско земјоделско производство да се вклучат:
а) различни видови во однос на добитокот;
б) различни сорти кои можат лесно да се разликуваат во однос на растенијата и
в) исти видови во однос на алгите и животните од аквакултура под услов да постои јасна и ефективна одделеност меѓу производствените локации или единици.
(10) По исклучок од ставот (9) точка б) на овој член во случај на повеќегодишни насади на кои им е потребен период на одгледување од најмалку три години, можат да се вклучат различни сорти, кои не можат лесно да се разликуваат или исти сорти, под услов производството да е во рамките на планот за преод и под услов преодот на последниот дел од површината на која се однесува производството во органско земјоделско производство да започне што е можно побргу и да се заврши во рок од најмногу пет години.
(11) Во случаите од ставот (10) на овој член:
a) земјоделецот треба да го извести контролното тело за почетокот на бербата за секој од засегнатите производи најмалку 48 часа однапред;
б) по завршувањето на бербата, земјоделецот треба да го извести контролното тело за точните количини собрани од засегнатите единици и за преземените мерки за одделување на производите и в) планот за преод и мерките коишто треба да се преземат за да се обезбеди ефективно и јасно одделување, контролното тело ги потврдува секоја година, по почетокот на планот за преод.
(12) Барањата кои се однесуваат на различни видови на сорти, утврдени во ставот (9) точки а) и б) на овој член, нема да се применуваат во случај на истражувачки и образовни центри, расадопроизводни центри, мултипликатори на семе и селекциони активности.
(13) Доколку, во случаите наведени во ставовите (9), (10), (11) и (12) на овој член на сите производствени единици од земјоделското стопанството не се управува согласно барањата за органско земјоделско производство, субјектите треба да:
а) ги чуваат производите и супстанциите искористени за единиците за органско производство и за производствените единици во преод одделно од оние коишто се користат за единиците за неорганско производство;
б) ги чуваат производите произведени во единиците за органско производство, производствените единици во преод и единиците за неорганско производство одделно едни од други и
в) водат соодветна евиденција во која е прикажано ефективното одделување на производствените единици и на производите.
(14) Дополнителните барања и начинот на поделба на земјоделското стопанствo во производствени единици за органско земјоделско производство, за производство во преод и за неорганско производство поблиску ги пропишува министерот со прописот од членот 14 став (10) од овој закон.
Службен весник на РСМ бр.56/2026 од 17.03.2026 влегува во сила на 25.03.2026, ќе започне да се применува од 1 јануари 2027 година.
